XIBA, Herrien arteko topaketak
Herri Kirolak gizonentzat sortutako
esparrua izan ohi da. Gauza asko jartzen dira jokoan Herri Kiroletako probetan:
ohorea, dirua, … batzuetan gozamenerako tokia gelditzen ote den galdetzen diogu gure
buruari. Horretaz gain, gaur egun ezagutzen ditugun Herri Kiroletako modalitate
gehienetan (ez guztietan baina bai gehienetan) indarra da erabiltzen den
gaitasun fisiko nagusia. Hori dela eta, oso prototipo zehatza duen pertsonak
eduki dezake arrakasta Herri Kiroletako jardueretan.
Egoera hau irauli nahian eta Herri
jokoez eta kirolaz gozatzeko aukera dagoela erakusteko, 2003. urtean Ikastolen
Elkartearen baitan aritzen zen Xiba proiektuak herrien arteko topaketa batzuk
sortzeari eta asmatzeari ekin zion.
Horrelako topaketak martxan jarri
nahian antolatzaileek oinarrizko printzipioak argi adierazi zituzten. Lehenik
eta behin Topaketa hauetan edozeinek har zezakeen parte. Generoa ez zen inolako
baldintzarik izango parte hartzeko. Ez eta pertsona bakoitzak zituen ezaugarri
antropometrikoak ere. Argala, gizena, txikia, altua, … denek, 16 urtetatik gorako
pertsona guztiek, aukera berdinak izango zituzten Xiba topaketetan parte
hartzeko.
Bigarrenik Herrien arteko topaketek
lotura zuzena zuten euskal kultura eta euskararekin. Topaketa hauek gure
kultura eta hizkuntza bizitzeko, emozioekin sentitzeko topaketak izan
behar zuten.
Hirugarrenik, naziotasuna pertsonen
arteko elkar-ezagutzatik landu eta sustatu nahi zen. Proiektuak, beraz,
ezinbestean izan behar zuen nazionala.
Eta azkenik, txukun eta ondo
antolatutako topaketak izan arren, maila konpetitiboa ahalik eta neutralizatuen
egon behar zen, eta sailkapenaren arabera irabazleren bat bazegoen ere,
amaieran antolatzen zen bazkari edota afarian parte hartzea guztientzat partizipazioaren errekonpentsa bilakatzen zen.
Zizurkilgo taldearen partizipazioa Herrien arteko topaketetan
Zizurkilek lehenengo unetik topaketa
hauetan parte hartzea erabaki zuen. Egia esan, antolatzaileek asmatzen zituzten
probetarako beharrezkoak ziren ezaugarrietan, Zizurkilgo hainbat pertsona
soberan trebatuta zeuden. Esan beharra dago antolatzaileek, partizipazio zabala
sustatze aldera, indarra bai, baina baita zehaztasuna edo punteria, dantza
edota hainbat kasutan zoria eskatzen zituzten hainbat proba asmatzen zituztela
ere.
Zizurkilgo taldea berehala osatu zen eta entrenamendu hitza erabiltzea gehiegizkoa bada ere, hainbat prestaketa saio egin ziren. Kezka nagusia honako hau zen: “plazan lan txukuna” egitea.
Comentarios
Publicar un comentario