Jolas-Joko-Kirolaren bilakaera Zizurkilgo herrian
Kirolaren bilakaera historikoa,
edozein herritan, ondare kulturala bilakatzen da. Gaur egun kirola kontzeptuaz
ezagutzen duguna ez da beti horrela izan. Garai hauetan kirolaren fenomenoari
esparrua formal, antolatu eta ia guztiz instituzionala dela aitortzen badiogu
ere, ez da beti horrela izan. Kirola jatorrian ludikotasuna izan daitekeen
multzo handi batean sartzen zen; alegia, ongi pasatzeko erabiltzen zen denbora
eta egiten ziren ekintzak. Herri bakoitzak badu bere tradizioa, badu bere
ibilbidea. Zizurkilek ere badu berea.
Ondorengo lerroetan Kirolaren
fenomenoaren inguruko hurbilketa antropologiko xumea eskainiko dizuegu:
Zizurkil herriak bizi izan duen garapen ekonomiko sozialaren arabera,
ludikotasunak ere, azkenean kirol bihurtzeko izan duen bilakaera historikoa.
Zizurkil: bi mundu herri batean
Zizurkil historikoki herri nekazaria
izan da. 50-60 hamarkadan garatu zen industrializazioa zela eta, Zizurkilgo
herriaren izaera aldatzen joan zen eta herria jarduera ekonomikoaren arabera,
bi zonaldetan banatu zen: herrigunea nagusiki nekazari izaten mantendu zen
bitartean, Elbarrena industrializatzen joan zen.
Kirolaren bilakaeran eta garapenean
oso lotura estua izan du bereizketa honek. Eremu nekazarian baserria oinarria
bada ere, zonalde industrializatuan, modernitatearekin
batera, elkarteak dira oinarri.
Baserrietan ludikotasuna uste baino
egituratuago dago eta egituraketa horretan generoaren banaketa zehatza da.
Baserrian ludikotasuna zirkulu kontzentrikoen arabera antolatu ohi da.
Bigarren zirkulua baserriaren inguru
hurbilean legoke. Hemen ere emakumearen presentzia nagusitzen da eta bere
jarduera ume eta gazteekin lotuta dago. Jarduerak mugimenduan oinarritzen dira,
jolas motorretan, alegia. “Baratzaren” inguruan garatzen da ludikotasuna.
Hirugarren zirkulua
konpartitua da eta pertsonen arteko elkar ezagutza ahalbideratzeaz gain,
generoen arteko harremana ere bidera dezake. Hirugarren espazio honen jarduera
nagusia lana da, baina nekazaritzaren ikuspuntu tradizionalaren arabera, lana
eta aisialdiaren arteko bereizketa ez da jendarte industrializatuetan ematen
den bezain zatitua eta lanarekin batera badira une ludikoak ere. “Soroa” da
espazio honen prototipoa eta helduak zein nerabeak aritzen dira bertan.
Laugarren zirkulu kontzentrikoa
ziurgabetasunean oinarritzen den espazioa da. Naturak du protagonismo nagusia
eta espazio horretan murgiltzeko inguru horren ezagutza handia behar da.
Lanerako espazioa ere bada, aurrekoan bezala lana eta aisialdia guztiz lotuta
baitaude. Tradizionalki, baserritik urruntzen goazen heinean gizonen presentzia
nagusitzen da. Ziurgabetasuna maiz misterioan oinarrituriko kondairekin lotuta
egon da, ziurgabetasunak bizitza propioa izango balu bezala. “Basoak”
irudikatzen du laugarren espazio hau eta
gizonezkoen espazioa izateaz gain bertan helduek bakarrik dute tokia. Hara
ailegatzeko “iniziazio erritoa” beharrezkoa izan daiteke.
Bostgarren eta azken espazioa eremu publikoa da. Eremu publikoa “herriko plazarekin” lotzen da eta hemen ere gizonezkoen presentzia nagusitzen da. Ludikotasunaren arabera, plazan erronkak eta apustuak egiten dira eta baserriaren izena eta ohorea era publiko batean goraipatu beharra dago.
Jolasa, Jokoa ala Kirola
Dagoeneko
hainbat aldiz aipatu ditugu kirol eta joko hitzak, ez horrenbeste, berriz,
jolas hitza. Errepara diezaiegun beraz, maiz nahasten ditugun hitz hauen arteko
ezberdintasunei eta ezaugarriei.
Jarduera
ludikoa izan daiteke kirola irudikatzen duen kontzeptu onena. Ludikotasuna pertzepzio
bat da, pertsonak bizi duen sentipena. Jarduera ludikoa egiterakoan egoerak
berak gozamena sorrarazten digu eta sentsazio honek jarduera hori berriro
errepikatzera bultzatzen gaitu.
Kirolari
baten lehenengo motibazioa jarduera ludikoetan oinarrituta sortzen dela esan
dezakegu, “umeen parketatik sortzen dira biharko kirolariak!”.
Kirola ez da
jolasa; jokoa kirolaren mundura garamatzan bidea izan daiteke.
Jolas-joko-kirola, argitu beharreko kontzeptuak dira.
Herri batean dauden eremu ludikoak oso adierazgarriak eta erabakiorrak izaten dira jolas, joko edo kirol jarduerak egin ditzagun. Herriguneko San Millan eskola ondoan dagoen parkea, adibidez, guztiz bideratuta dago umeen jolaserako. “Danena” futbol zelaia, berriz, dugu kirola, futbola egiteko herrian dugun erreferente argiena.
Kirolariak sortzeko, beraz, haur, ume eta gazteak ludikotasunaren filosofian hezitu behar dira. Heziketa horretan ludikotasuna pertsonaren gozamenaren oinarria izanik, motibazioak kirolari izatera bultza dezake. Horregatik maiz talka egiten dute bi norabideek: batetik, kirol hezigarria, bestetik, kirol teknifikazioa. Lan honetan eskola- kirola edo kirol eskolaren inguruan gure herrian egon diren esperientziak aztertzeko aukera izango dugu.
Comentarios
Publicar un comentario