Zizurkilgo Jolas, joko eta eta kirol guneak
Zizurkilgo espazio ludikoaren azterketa
Aurreko orrietan esandako guztiaren
ondoren, azpimarra daiteke Zizurkilen dagoen espazio ludikoak ez diola plan
orokor bati erantzuten. Zalantzarik gabe ludikotasunean oinarritutako jarduera
fisikorako instalazioak eta guneak egon badaude, baina hauen sorrerak une eta
garai ezberdinei erantzuten die eta, ondorioz, egun duguna inolako irizpide
globalik gabe sortutako gune hauen batura besterik ez da.
Gune hauek ez daude espazio
urbanistikoan txertatuta. Gehienetan, “soberan” dauden espazioei erabilera
zehatza eman nahian, espazio horietan bertan instalazio ludikoak eraiki egiten
dira. Gure herrian, gune horietako batzuk ez dituzte betetzen bete beharko
lituzketen funtzioak. Bulandegi bidearen hasierako (errotonda) etxeen atzeko
aldean dagoen umeen parkea oso gutxi erabiltzen da. Bulandegi bidearen beste
aldean Zezen plaza deitzen zaion
etxeen atzean dagoen frontoiak ere eraiki zen garaiko proiektu urbanistikoari
erantzuten dio, ez benetan zonalde horretan dagoen behar ludikoari. Zer esanik
ez, herrigunearen kasuan. Pello Mari Otaño plaza elkargune ludikoa izan
beharrean, trafikorako bidegurutze bihurtu da. Herrigunearen parkea bi
eraikinen artean “txokoratuta” egon arren, plazak bete beharko lukeen funtzioa
egiten du, bertan haurrak eta gurasoak biltzen dira behar sozial bat dagoelako.
Zizurkilek duen ezaugarri positibo
bat naturaz inguratuta egotea da. Herriko edozein tokitik metro gutxi egin
behar dira gune urbanizatuetatik aldentzeko eta naturan murgiltzeko.
Horretarako azpimarratzekoak dira herrian dauden bi bidegorri: bata, Asteasu
aldera doana, bestea Aduna-Villabona Bulandegi auzotik igarotzen dena. Gainera,
herriko bazterrak ezagutzeko hainbat mendi ibilbide ere egon, badaude. Ibilbide
hauek, gainera, herriko hainbat arlo tematikoez osatuta daude (karobiak,
mugarriak, mendi tontorrak, elur-zuloak, …).
Hala ere, bide hauen inguruan bi
aipamen egin behar dira. Lehenengoa da herri barruko desplazamendurako barruko
bideak edo loturak modu ziur eta atseginean egiteko dagoen hutsunea, bereziki
herrigunea Elbarrenarekin lotzeko bideak. Bigarren aipamena mendi ibilbideen
mantenuari buruzkoa da, izan ere, ezinbestean bide hauek zainduta eta irekita
mantendu behar dira, bestela, denborarekin eta naturaren indarrarekin bide
hauek erabilezinak bihurtzen direlako.
Espazio publikoa toki ludikoa bihurtzeko
ahalegina
Espazio
ludikoaren azterketa egin aurretik, zein den espazio ludikoen erabilera eta
funtzioa argitu beharra dago.
Espazio ludikoa
aisialdiaren espresiorako gune egokitua da. Batzuetan ez da aparteko
azpiegiturarik behar, besteetan, berriz, eremua urbanistikoki birmoldatzeko
ezinbestekoa bihurtzen da. Horregatik aisialdiaren esanahiaren baitan
askatasuna eta planifikazioaren arteko dikotomia egongo da beti.
Edo, beste era batean esanda, pertsonak bere gozamenerako behar duen espazio
ludikoaren erabilera eta administraziotik aisialdia orokortuz eraikitzen dituen
espazio ludikoak.
Espazio ludikoek oinarrizko antolaketa behar dute. Aisialdia gozamenaren
sentipenarekin lotzen denez, lehenengo faktorea beti pertsonala eta indibiduala
izango da. Baina aisialdia jolasarekin ere lotuta dago eta, beraz, aisialdia
besteekin partekatzean gozamenerako iturri bat ere izan daiteke. Hala ere,
aisialdia inbertsioa ere bada. Eta inbertsioa guztiz lotuta dago errentagarritasunarekin. Horretarako aisialdiak duen beste
faktore garrantzitsua planifikazioa da. Administrazioak herritarrei zerbitzu
hau eskaini nahian, aisialdiaren garapenerako zenbait inbertsio egin ditu eta
planifikazioaren bitartez errentagarritasuna ateratzen saiatzen da.
Ekintza dibertigarria
Ekintza
dibertigarriak ezinbestean bi ezaugarri bete behar ditu: batetik, boluntarioa
izan behar da eta, bestetik, gozamena sortu behar du. Inor ezin da behartu
ekintza dibertigarria egitera, izan ere, behartze horrek automatikoki alde
ludikoa desegiten baitu.
Ekintza
dibertigarriak esperientzia pertsonalak dira, baina batentzat dibertigarria
dena, beste batentzat desatsegina izan daiteke.
Dibertitzeko denbora
Arazo bat da
pentsatzea dibertitzeko dugun denbora soilik egunean bete behar diren jardueren
ostean geratzen den denbora librera mugatu behar dela. Uste oker honetatik
dator aisialdia eta dibertimenduaren arteko erlazioa, ia sinonimoak direla
pentsatzera iritsi arte. Pentsamendu hau zortziko eskemaren arabera eraikita
dago: 8 ordu lanean, 8 ordu lo egiteko eta 8 ordu aisialdirako.
Errealitatea
aipaturiko eskema honetatik oso urrun dago. Izan ere, hainbat jarduera, nahiz
eta ordainduak ez izan, lanarekin parekatzen dira (zaintza,
…) eta dibertitzeko eremua bertatik kanpo uzten badugu, gure egunak, horrela,
egun ilun eta tristeak bilaka daitezke.
Horrela bada, ezinbestekoa da 24 ordu horietan ezaugarri eta ekintza
dibertigarriak sartzea. Nahiz eta lanean egon, lana izan dadila ere
gozamenerako unea.
Dibertitzeko edota ludikotasunerako espazioa
Esperientzia
dibertigarria une eta gune batean bizitzen dugun sentipen bizipen ludikoa da.
Espazioak asko baldintzatu edota lagunduko du bizipen hori erabatekoa izan
dadin. Espazio batzuk trantsiturako antolatuta dauden bitartean, beste batzuk
espazio horietan gelditzeko eta gozatzeko eraikita daude. Espazio hauek
esperientzia intimo eta pertsonala ahalbideratzen dute, baina esperientzia
partekatzeko eta, beraz, sozializatzeko ere oso aberatsak dira.
Espazio ludikoa
izan daiteke ere espazio publikoa errespetatzeko eta defendatzeko tokia.
Espazioak “toki” bihurtu: espazio publikoari gehitu ahal zaion balore
ludikoa
Espazio publikoa
pertsonek espazio horretaz egiten duen erabilerarekin lotuta dago. Espazio
publikoa toki soziala izateko, pertsonek gune horri esanahi metaforikoa eman
behar diote. Espazio bat toki bihurtzen da pertsonarentzat gune
horrek sortzen dizkion
bizipenen bitartez esanahi berezia hartzen duenean.
Hendersonek eta Flelkek, espazioa toki ludikoa
bihurtzeko eman beharreko trantsiziorako, zazpi irizpide erabiltzen dituzte:
1, Espazio betegarria
Espazioa ekintzak
egiteko gunea da. Hainbat ekintza egiteko espazio bati esanahi bat emateaz gain
bere espazioa ekintza hori aurrera eramateko antolatu ere egiten da.
Denborarekin espazio hori jarduera zehatz baterako toki bihurtzen da, orduan
tokia sozializatu egin dela esaten da eta ildo beretik kulturaren barruan
sartzera iritsi daiteke
2, Deserrotzea
Gure jendartean
mugitzeko eta toki batetik bestera joateko dagoen joera ikusita, pertsonek
egonkortasuna eskaintzen duten tokiak nahiago dituzte gero eta gehiago. Seguru
aski, pertsonek jolasteko, erlazionatzeko eta besteekin elkarrekin bizitzeko
espazio zehatza nahi dute.
Aisialdiak
espazioak deserrotzeko aukera handia eskaintzen du, izan ere, aisialdian
esperimentatzen ditugun esperientziek tokiari bizipenaren arabera esanahi
berezia ematen diote.
Horren bitartez pertsonen
artean konexio berezia sortzen da eta espazio publikoa desplazamendurako
izatetik (toki batetik bestera joateko) bertan egoteko toki bilakatzen da,
esperientzia gozagarriak bizitzeko eta konpartitzeko toki erreferentzial batean
bihurtzen da.
3, Tokia eta denbora
Gauzen
identitatea espazio-denbora elkarrekintzetatik sortzen da. Orokorrean ez gara
horretaz jabetzen baina egiten dugun guztiak espazio-denbora egitura bat behar
du.
Kultura
kontsumitzeak, espazio jakin batean denbora erabiltzea suposatzen du. Denbora
mugimendua da, tokia eten bat.
Toki batekin
sortzen dugun atxikimendua, ematen dugun denborarekin eta denbora horretan
esperimentatzen dugun bizipenekin erlazionatuta dago.
4, Tokia eta egoera mentala
Toki bati ematen
diogun esanahia pertsonaren gogoan sortu eta gorde egiten da. Irudikapena eta
sormena ezinbestekoak dira tokia esanguratsu bihurtzeko. Horretarako aisialdia
oso fenomeno indartsua da. Hasiera batean tokiaren ezagutza barne sentsazioekin
sortzen da eta sentsazio horiek tokiarekin lotutako irudiak sortzen
dituzte pertsonaren gogoan. Ez dago esan beharrik oso sentsazio ezberdinak
izango direla aisialdian edo lanean sortutakoak.
5, Identitatea eta harreman soziala
Tokiek
sortzen dituzten harreman sozialak dinamikoak direlako, espazioak ez
dira gune estatikoak. Komunitatea toki batekin lotu
daiteke, beti ere, toki hori identitate kolektibo batekin irudikatzen bada.
Fenomeno sozial guztiek espazioari garrantzi handia ematen diote.
6, Tokia eta boterea
Espazioa
boterearekin erlazionatuta dago. Espazio fisikoek, eta horietaz dugun
pertzepzioak askatasuna edo errepresioa sortzeko indarra dute. Ez dago espazio
publikorik pertsonak ez badira espazio horrekin identifikatuta sentitzen.
Espazioak pertsonen arteko harremana zehazten du, eta bere baitan genero
eraikuntza soziala ekoiztu eta berrekoiztu egiten da.
Bestalde, ezin da
gutxietsi espazio publikoak kudeatzeko garaian, kontrolatzeko, segregatzeko eta
esklusioa sortzeko duen eragina.
7, Tokiak eraikitzeko aisialdia
Aisialdirako
espazioak toki esanguratsuak izan behar dira ezinbestean. Esanguratsua izateko,
prozesua espazioaren lanketa oraindik egitasmo soila denean martxan jarri behar
da. Partizipazioa nola eta norekin gauzatuko da? Zein motatako harreman soziala
sortu nahi dugu toki horretan? Zeinek emango dio jarraipena tokiaren
esanahiaren bilakaerari?,… galdera asko egin daitezke proiektua oraindik
diseinu fasean dagoenean.
Ondorioak
Administraziotik
espazio publikoaz orokorrean eta espazio ludikoaz bereziki egiten den lanketa,
gehienetan ikusmolde arkitektoniko, urbanistiko eta tekniko batetik ematen da. Baina normak jarraitzeak ez du beti proiektu batek
duen xede nagusia bermatzeko aukerarik eskaintzen. Espazio publikoa toki ludiko
eraldatzeak ez du soilik urbanismotik dauden segurtasun arauak aplikatu behar
direla esan nahi. Ez dago zalantzarik segurtasuna ezinbestean kontuan hartu
beharreko ezaugarri bat dela, baina ez bakarra. Toki ludikoa sortzeko eta
lortzeko arreta osoa jarri behar da esperientzietan eta bizipenetan. Horrela,
egoera berri honek harreman sozialak pizteko eta indartzeko aktibatzen diren
mekanismoei modu iraunkor batean jarraipena emango die.
Tonuccik dioen bezala, parke baten diseinuak ez du arkitektoek agintzen duten arauen menpe egon behar; parke baten diseinua umeek beren ilusioarekin amesten eta irudikatzen duten tokia izan beharko luke.
Esperientzia ludikoa osoa izateko oso garrantzitsua da gozamenari kanpoko mugarik ez ezartzea. Mugak bizipenak berak erakusten ditu eta esperientziatik ulertu eta barneratu egiten dira. Administrazio batek bere barne arauekin zer den zuzena eta zer ez esatearekin ez da nahikoa izaten herritarrek, udalak hartutako erabakia bere egin dezaten. Xedea ez da espazio publiko politak sortzea, espazioaren edertasuna bigarren mailakoa izan daiteke baldin eta herritarrek bertan izango duten bizi esperientzia aberasgarria baldin bada.
Comentarios
Publicar un comentario